jeudi 8 avril 2021

قتلوهوم وتهناو!!!! واش هدي بداية ابادة جماعية لشعب بأكمله؟

 .

... هادشي بزاف:  المغاربة عايشين فحبس



بنادم غادي يحماق 


باينة اليوم بللي الدولة باغيا تصفيها للمغاربة من خلال التدابير الجد قاسية اللي خداتها فرمضان


منع بنادم من الخروج ابتداء من التمنية ديال الليل، كايشكل خطورة كبيرة على الحياة ديال المغاربة


اولا، خطورة على الجسم ديالهم: حيث الصائم مللي كاياكول فالمغرب خصو يتحرك شوية، ويتمشى باش يهضم الكمية المهمة ديال الماكلة الغنية بالبروتيين والكالوري اللي كايطحنها فالمغرب


بالتالي، ادا تم هد المنع من الخروج وماوقاعش التراجع عليه، غادي تلقى بنادم زاد 20 كيلو فالميزان فنهاية شهر رمضان. كما غادي تلقاه كل ليلة كايتوجاع من الطحين ديال الماكلة اللي غادية تبقى معمراليه المعدة.


 بالإضافة لظهور امراض غادية تنتج على الجلاس فالدار وعدم التحرك


ثانيا، من الناحية الثقافية واحترام تقاليد المغاربة فشهر رمضان، بنادم كايخصو يمشي يزور بعضو بعد الإفطار وكايخصو يتلاقى مع الأصدقاء فالقهوى ولا فالشارع العمومي


أضف الى دلك، التقاليد العبادية اللي كتطباع الشهر المبارك من صلوات جماعية (بطبيعة الحال مع احترام التدابير الوقائية) كالعشاء والتراويح


اما الكوميرس ديال الليل فحدث ولا حرج: السدان ديال القهاوي والريسطورانات غادي يعمق الكارثة اللي كايمر بها هد القطاع.


 بالإضافة للحوانتية والعديد من أماكن بيع المأكولات الخفيفة.


 هد الوضعية غادية تخروج على بنادم اللي عايش بوحدو وللي متعود ياكول خارج الشقة ديالو، وللي ماغادي يلقى منين يشري ماكلتو


هد الوضعية غاديا تسبب فمشاكل اسرية مللي الرجال غادين يضطر يبقاو فالدار مور الفطور وغاديين يخسرو البرنامج ديال العيالات اللي كايتابعوا المسلسلات التركية والهندية والميكسيكية


ادا قبلوا المغاربة هد الضربة وماتحاركوش بحال اللي دايرين التجار ديال بني مكادة فطنجة، يكونو على يقين ان السلطات غادية تمشي ابعد من هدشي وغادية تسمح ليهوم يخرجوا ساعة ولا ساعتين من ديارهم


هادشي بزاف وخص المغاربة يتحركو ويواجهو هد الظلم اللى كايتشد الخناق ديالو عليهم يوم على يوم

Aucun commentaire:

Enregistrer un commentaire