رسالة من طمجاوي الى

.

...ملك المغرب

سماع أخاي: شنو باغي تشرحنا زاعما؟

 بللي انتينا صحيح وفوروصو؟

 واييه اسيدي حنا كانعارفوك صحيح كثار من هيركول وماسيست وكثار حتى من طرجان

واييه، انتينا مايقد عليك غير اللي خلقك

ايوا نعال الشيطان وطلاق ديك العواول دالحسيمة وديك القليول دالمهداوي

اللي غلب كايعف أخاي وانتينا غلبتينا ومابغيتيشي تعف

الناس كاملين كايرغبوك ونتينا معانطز علينا ماحشمتي لامن الكبير لامن السطيطو

كيف جاتك زعما كاتشوف يماه دناصر مريطة بالكانصير ومعدومة وكيف حب لا الله وسيبتيلا بنى فالحبس دفاس باش تمحنى مع الطاكسيات كبار فالمشي والمجي

والله ماكاتحشم. عمل غير على وجاه ديك النسا اللي كايضربو مسافة كبيرة باش يطللو على ولادوم اللي كايرشاو فالحباسات

حنا عارفين بللي ماكاين لا قضاء لا قانون لاهم يحزنون

حنا ماشي حمير، حنا غير خاوفانين منك ومن البوليس وشاباكوني والقوادين دالمقادمية

حيث انتينا وباباك ربيتونا على الخوف وزرعتو فينا بوهزهاز  

غادي نقولك واحد الحاجة واعرة أعشيري وديها صحيحة من عندي ونتينا عارفا: الشعب اللي كان كايحبك مابقاشي كايبغيك.   المغاربة  كايبولو فالسروال مللي كايسمعو اسمك

والنهار اللي غادي تطيح حتى واحد ماغادي يحرك يدو باش يعاونك ولا ينقدك

خصك تفيق من النعاس، راه كانو كبار منك وجماعلوم الشعب رجلوم. نسيتي الشاه دإيران، وصدام

انتينا عارف هد اللعبا على داكشي دورتي راسك بالألوف ديال البوليس والسيمي والعسكر

وإلى كنتي عوال على فرنسا وأمريكا والسعودية يفكوك من الإنتقام دالدراوش والضعافا، راك غالط الشريف

فرنسا مافاكتشي بنعلي نهار اللي وصلت الساعة ديالو وهيطوه توانسا. وفرنسا
 هيطت القدافي وخا كان كايدفاعلا المنايل ودفعاتو نالبزاوز باش يخسرولو كمارتو

انا عارف هادشي ماغادي يدخولك لا من الودنبنة دليمين لا من الودنينة دالشمال

لأنك مابقيتيشي بوحدك مسيطار على الدزة. دخلوا معاك شي مساخط صحاح ماغاديشي يخليواك ترجاع نالطريق الصحيح

انا غير كاننبهك السي محمد وصافي. الى كنت كاتخمم شي شوييش فالمستقبل ديالك ودوليداتك، رجاع نالطريق دسيدي ربي وطلاقنا ديك العواول اللي كايرشاو فالحبس

ولمحكمتكم  واسع النظر قبل مايهزولك رجلك

راالدنيا ماعطات عهد الله نحد