بروفايلات المغاربة..المدمنين على الفايس

.

.قناصو البنات وعارضات المحاسن والمحتكونبالكبار

خلينا من هادوك العيالات البوكوصات اللي كايخرجو ليها نيشان مللي كايديرو لايفات وكليبات باش يعرضوا على الجنس الخشن زينهوم وتليفونهوم وهويتهوم كمطلقات ولا عازبات بغرض البحث على صباط ولا شربيل يدخول ليهوم فرجلهوم

هادوك بعضا واضحين

  الخيبات والكبيرات كايعطيو معلومات أنتيم على نفوسهوم من أجل الرغبة فبناء عش مع رجل شاب وزوين جاي من المغرب وكايقدمو معطيات شي شوية حساسة بحال امتلاكهوم للجنسية الفرنسية او البلجيكية وكدلك توفرهوم على خدمة فاعلة تاركة وبارطما ولا كاع دار وطاموبيل 

هادو كايكثرو فالصباغةوالطلا بحال ادا طاحو وسط برميل ديال الماكياج.

الرجال والعزارا نفس الشي.

كاتلقاهوم صباح وعشية كايعرضو صداقتهوم على العيالات ديال الخارج بعد ما كاينجحو فاقتناص العناوين ديالهوم عبر الميسانجير

غالبا عاطلين عن العمل ولا كايدورو الناعورة "أكوش ولا أدرواط" فشي خدمة هشة بصاح مللي كاتقرى البروفايل ديالهوم كاتقول هنا نبات: شي انجينيور، شي أستاد جامعي أو رجل أعمال ...مللي كاتبحث كاتلقاه كايبيع جبان ولا كايفرش فسوق الدراويش 

تعليقاتهوم على تدوينات العيالات لاعلاقة لها بمضمون ومحتوى النص وكاتمشي ديريكت للفروطاج واللحيس بحال:" دائما متألقة" أو "وووواووو" أو اسئلة أيحائية وتلميحية على الوضعية الإجتماعية للسيدة المدونة او واش مزوجة ولا قتلت رجلها

غير كايعرافها مطلقة ولا مازالا بنت، كايتفنن فداك العبارات الثقيلة ديال الزلاولية المغاربة

كاين شي بعضين كايموتو على التصاور مع المشاهير الباسلين الحامضين أمثال رشيد شو ولا الناصري وكاع هادوك اللي جايين من المغرب يصيدو فرصة البقاء باروبا من بعد العروض ديالهوم 

فبلجيكا عندنا شي خوت وخواتات واعرين فالسيلفيات مع السفير والقنصل وأخنوش وكل السياسيين الحامضين اللي كايحطو الرحال ديالهوم فبروكسيل

كاينين شي آخرين اختصاصيين فالتقاط الصور بجانب المعالم الأروبية المعروفة بحال تور إبفيل وشانزيليزي ولا طوميوم وزيد وزيد. 

ناهيك على هادوك اللي كايقضيو وقتهوم فالايفات كايهددو الخصوم والاعداء ديالهوم بإرسالهوم للسحن في رمشة عين حيث يدهوم طويلة وعندهوم ركايز ومعارف صحاح فالقصر الملكي او القضاء أو الأمن

الفايس ولا سوق عكاظ ديال المختلين عقليا والناس اللي كايعانيو من انفصام فالشخصية او من عقد النقص المستدامة ...

هادشي اللي كاين فهد الساعة وألى تدوينةأخرى