المستقبل ديال المغرب سياسيا وثقافيا: إما الملكية المطلقة أو

غادي يكون داعشي بدون ادنى شك

هل بقي شيئ يتوجب انقاده

 لأن جل الشعب أصبح مدعشش ومتأسلم، يعشق ضرب الرقاب وقطع الأيادي والأمر بالمعروف والنهي عن المنكر و ممارسة شرع اليد وتعدد الزوجات والسحر والرقية وزيارة أضرحة السادات وتنفيد الحكم بالإعدام

الشعب المغربي مابقاش هو الشعب اللي عرفناه فستينيات وسبعينيات القرن الماضي حيث مللي كان شي واحد فالحومة كايتكرفس على شي جار ديالو، الحومة كلها كاتعاقب المعتدي وكاتنبدو وكاتتضامن مع المضلوم

اليوم هداك اللي تعدى على جارو كايصباح بطل  وللي كلاها فجنابو كايولي حمار وكايقولو الجيران: حو فيه، هو حمار 

بخصوص الإعدام: ادا سولتي المغاربة بعد أي حادثة شنيعة ديال إعتداء، كن متأكد أن أغلبيتهم الساحقة غاديين يطالبوا بتنفيد الإعدام فحق الجاني، وخا غير سمعو بالحادثة ولا شافو شي فيديو كيتكلم عليها

صباحنا متعطشين للدم وللإنتقام وكانعتابرو أن تنفيد حكم الإعدام وشرع الله إجابة على الإحساس الداخلي بالحكرة والضلم اللي كانعانيو منهم

الأغلبية الساحقة ديالنا كايملكو اليقين القطعي بأن الإسلام دين سلام وتسامح وأن داعش والقاعدة ماشي مسلمين حيث مافهموش مزيان الإسلام في الجوهر ديالو الحضاري والإنساني

لكن جلنا كايبتاهج داخليا مللي القاعدة كاتنفد شي عملية انتحارية ضد النصارى ولا اليهود

 داعش والقاعدة وحتى حكام السعودية وأندونيسيا مللي كايرجمو الزانية والزاني فالساحة العمومية كايرتكبو جرائمهم بإسم الإسلام

هداك اللي كايقولك الإسلام دين حق وعدل حتى هو مللي كاتتاح ليه الفرصة كايدير شرعو بيدو بحال ديك المجموعات ديال الأمر بالمعروف والنهي عن المنكر اللي كاتعاقب المخالفين لأمر

 الله

  والأمثلة كثيرة فهدالموضوع 

أنا متأكد انه لو طاح النظام المخزني، هادشي اللي كانقول ماشي دفاع على النظام الفاسد اللي قائم فالمغرب ، وأمام الفراغ الأخلاقي والتعصب الديني اللي تفشى فأوساط الشعب المغربي، غادي يكون الطايح اكثار من الواقف وغادي تلقى محاكم التفتيش الديني فكل حي وفكل مدينة وقرية

وماشي الأحزاب الفاشلة اللي مابقات عندها لاقواعد ولا مبادئ اللي غادية تعمار هد الفراغ بل على العكس جميع القادة ديال هد الأحزاب بما فيهوم الإسلاميين غاديين يسلتو للخارج

حيث كلهوم عمرو حساباتهوم فالعواصم الأروبية وخرجو ولادهوم شي لفرنسا شي لبريطانيا وأسبانيا وألمانيا

شوف غير حميد شباط، بعد ما هرب ولادو لألمانيا التحق بهم وحصال على الجنسية الألمانية

شوف وزير الداخلية الأسبق حصاد، بمجرد ما خرج من المنصب ديالو حزاق لفرنسا باش يعيش فالفيلا اللي شراها لاولادو

بلا مانهضرو على ديك الوزير العلمي اللي كايخروج كل نهاية أسبوع لماربيا على مثن طائرته الخاصة وكايرجاع للمغرب مللي كاترشقليه

كل هادوم عارفين بللي مابقى مايترجى فالمغرب وعارفين كدلك بللي المخزن غادي يطيح وبللي الملك براسو غادي يحزاق للقصر ديالو اللي موجود فضواحي باريس

لهدا وليس من باب التشاؤم، اعلنها بصريح العبارة للمغاربة: مللي غادي يسلتو الأعمدة ديال المخزن للخارج، المغرب غادي يدخول فواحد الدوامة ديال العنف والعنف المضاد وتصفية الحسابات بين العصابات والجيران  اللي غاديا تبان فردوس سوريا قدامها

سميوني انهزامي ولا رجعي ولا اللي بغيتو: كانقول للمغاربة اللي قدار يسلت مايدوارشي موراه