محمد السادس هو ...

 .

 الجوكير ديال المخزن (Le Joker)

 

 القمايريا اللي كايلعبو مزيان لعبة البوكر  بحال ولد الوزير الداودي كايعارفو مزيان شنو المعنى ديال الجوكر.

 بالنسبة للمسلمين اللي كايقتاداوا بالآية القائلة "إنما الخمر والميسر والانصاب والأزلام رجس من عمل الشيطان فاجتنبوه لعلكم تفلحون"، واللي عمرهوم ماميزاو  شي درهم فاليانصيب او شربوا الجعة، المعنى ديال الجوكر هي داك الكارطا الرابحة اللي كايحتافظ بها القمار حتى النهاية وكايلوحها فوق الطابلة باش يطلاع من الحظ ديالو فالربح

غير باش ماندوزوش على تحريم الخمر مر الكرام، هد الشراب اللي كايواعد الله بيه المسلمين فالجنة ماعمرو كان حرام فالقرآن.

 بمعنى أن كلمة حرام او فعل حرم  (مبني للمجهول) ماكاينش فالدكر الحكيم. 

كل ماكاين فالأمر ان الله نبه المسلمين لتجنب الفودكا والويسكي والجعة والماحيا وغيرها من المواد الكحولية

وهدا التنبيه جا على مراحل تتخللها سنوات من بعد نزول الوحي حيث الإمام اللي كان كايصلي بالمسلمين كان كايكون غالبا ضارب شي كيسان وحتى الرسول والصحابة كانوا كايصليو موراه

 

والآية الأولى اللي نزلت فحق الخمر كانت هي التالية: يا أيها الدين آمنوا لاتقربوا الصلاة وانتم سكارى، نزلت هد الآية لأن عمر ابن الخطاب اللي كان كايؤم الصلاة بالمسلمين فالمدينة كان ضارب الطاصة ومللي دخال فصورة الكافرين تخاربقولو الموارا وخلط شعبان مع رمضان مللي قال :قل يا أيها الكافرون أعبد ماتعبدون ......

اللا غد ليه كونفوكاه الرسول للبيرو  وخبروا بنزول الأية

لكن عمر وباقي الصحابة بقاو كايشربو مدة طويلة مور نزول هد الآية. 

غير كانوا كاييتجنبوا أوقات الصلاة وبالليل كانوا كايعرقوها بالمعقول

 ادا كاين شي واحد فيكوم واعر فالدين يقولي علاش المسلمين كايوقفوا الشراب اربعين يوم قبل رمضان

 

لو كان الصحابة عندهوم السيارات فداك الوقت لكانوا الكسيدات على الجهد. حيث الخيل هو اللي كايوجه راسوا ماشي السكايري اللي راكب عليه

واحد النهار سولو شيخ الأزهر الطنطاوي الله يرحمه على رأيو فأم كلثوم، جاوبهوم بللي هو عندو أغلب الاغاني ديال كوكب الشرق اللي كاينتاعش بيهم مللي كايكون بوحدو وزاد قال للصحافي اللي سولوا بللي الاغنيةاللي كاتهبلو هي قصيدة الاطلال. 

 غير الشيخ مادكرش المقطع الشهير ديال هد التحفة الأمكلتومية : هل رأى الحب سكارى مثلنا

عودة الى الجوكير محمد السادس، المغاربة كلهم كايعارفو بللي الحكومة والبرلمان مافيدهومش. وبللي كايوقاف لهد المؤسسات حمار الشيخ فالعقبة وكايصعب عليها تمرير شي قرار او مشروع غير شعبي، كاتجبد الكارطا ديال الجوكير اللي مصوار فيها الملك باش كايدوز القرار بدون نقاش

العام اللي فات على طريق المثال مللي الحكومة طاح ليها المزان فقضية التجنيد الإجباري امام السخط ديال الشباب المغربي، استغثت بالجوكير اللي ضراب على الطابلة وآمر بتمرير هد القرار 

مؤخرا، بدا القيل والقال وكثرة السؤال حول اللقاح واش غادي يكون إجباري ولا بالتطوع. 

مللي الملك شاف الشمايت ديال الحكومة حاصلين والرقعة ديال الرفض كاتتوساع، جبد الجوكير ولاحو فوق الطابلة وقال: اللقاح غادي يكون إجباري ولدين مكوم غاديين تأديو عليه 2000 درهم واللي تململ نخلي دار بوه

وفعلا وقاع السكات فالصفوف. حيث المغاربة اللي كايطاكيو العثماني وأخنوش وسفيان البحري وحتى الحموشي وباطمة، كايعارفو بللي انتقاد الجوكير مامعاهش اللعب وأن القرعة فالمؤخرة كانتسناهوم

شعب كايخاف ماكايحشم