الديك المهداوي...

 .

...كايغاوت قبل ماتوصل السخانة لسيدو

الوالد الله يرحمو، كان قشايبي من الطراز الفريد. كل نكتة أو حكاية كان كايقولها لينا، كانت كاتحمل العديد من العبر والحِكَم

الحكاية ديال الديك، أو إدا بغيتو ديال الفروج اللي كايغاوت قدام زوج  ديال المساخيط سكرانين وقالبينها بونيا، ضحكتني بزاف

المخاريا  ديال هد الزوج  فباب واحد المقهى كانوا حاضرين ليها ناس كتار لكن حتى واحد منهم ماقدر يتدخل باش يفارق الدبايزيا

إلا واحد الفروج اللي كان موجود فالصطاح ديال واحد الدار اللي مقابلا القهوة. بوحدو داك الفروج هو اللي كان كايغاوت

أعباد الله، فرقوهوم قبل ماينزف شي واحد منهم ويطيح فالأرض. انا مزاوك، دخلو بيناتهم وحاولوا توقفو هد المدابزا

هكدا كان كايصيح الفروج وكايستاعطف بالكليان ديال المقهى اللي كانو عاجزين على جعل حد للمدابزا

كاع الناس اللي كانوا موجودين فعين المكان ردو البال للفروج اللي مابغاش يسكت

واحد الشخص توجه للفروج وسولو: مالك أنت مجنن وفاقد للأعصاب،  كثار كاع من الناس اللي موجودة هنا؟ فين همك إدا طاحت الروح؟

جاوبو الفروج: ماشي مشكل إدا طاحت الروح، المشكل هو إدا نزف شي واحد من هد السكايرية، كاع عباد الله اللي حاضرين غادي يقولو: " إيوا دبحوا الفروج وصوبوا صوبة يشربها الشخص اللي سخفان باش ترجع فيه الروح"

 كاع الجمهور اللي كان حاضر فهام المغزى من الغوات ديال الفروج

نفس الأسلوب كاينتاهجو المهداوي أمام كل مظلمة أو إنتهاك لحقوق المغاربة

 المعزاوي الفروج ماكايهموش الدفاع على حقوق المواطنين من تغول وظلم السلطة القمعية بقدار ماكايهمو الانعكاسات ديال الأفعال القمعية والتعسفية على الصورة والهيبة والحرمة ديال الملك فالداخل والخارج

بلا ما تضيع وقتك مع حميميد مول الدبابة وتحاول تقنعوا بللي الملك كرئيس كل السلط القمعية من أمن وقضاء ...هو المسؤول الأول والأخير على الانتهاكات ديال حقوق المواطنين بالمغرب، لأن شعار المعزاوي اللي لا ولن يتغير هو

الملك رجل مزيان، اللي ضايرين به هما اللي خايبين

حتى نهار اللي تحرشو البوليس بالزوجة ديالو امام الملأ صرح المعزاوي بللي هد الأفعال تسيئ لصورة الملك اللي موجود فوق ريوسنا 

وعمرك ماتسمع فالخرجات ديال المهداوي حديث على زوجة محمد السادس اللي غبروها أو الثروة الفرعونية ديال محمد السادس

لأنه مهما فعل ومهما نهب ومهما عدب ومهما نكل بالمواطنين، كايبقى محمد السادس خط أحمر ومعصوم من الخطأ عند العياشة أمثال الصحفي اللي كايقولو عليه أنه دوز 3 سنين فالسجن