آلمناضلين، ثوار الكافيار ديال الخارج...طلاعتولي فكري

.
...

...باراكا من الشكا  والبكا  وتشخيص  النظام
 
إدا عندكوم  شي  حلول  بينوها

سواء جمهوريين (زعما) ولا يساريين ولا إسلاميين ولا ساخطين على الوضع ولا ملكيين...عييتوني باللايفات ديال التكرار والبكا والشكا والفضح وبارطاجيو الخوت باش توصال 

للمسؤولين وغيرها من الدوران فالخوا

وليتو سبيسياليست ومختصين فتشخيص الأوضاع السياسية والإقتصادية والثقافية والجنسية والفقهية والسحرية

 
.شيبتوني بفضح الملك وأخنوش والعثماني


كاع المغاربة عارفين شكون كايسراق الدهب والفوسفاط وشكون اللي محتاكر الصيد فأعالي البحار. المغاربة كلهم عارفين بللي القضاء كايتلقى التعليمات 

من القصر

 
حفيتو وبديتو كاتحانقزو على كل فضيحة صغيرة وتافهة بحال البرلماني الغشاش فالباك ولا مسلسل بلقزيز مع مونية ولا الركيع ديال باطما والناصري

فينما كايخروج شي خبيار بدون قيمة

 كانلقاكم كلكوم بحال الدبان فوق طرو ديال الزبل كاتناقزو عليه وتزيدو وتنقصو

غير الطلاق ديال السيمو من مارتو كل كوم سوطيتو عليه وما خليتو ماختاراعتو: هاهي مسجونة، هاهي مقتولة بموس، هاهي فاليونان، هاهي طايحا مع الكارديكور ديال صديق ابو زعيتار، هاهيا كاتبكي عليها بنتها، هاهي فإيطالياوفبني ملال وفجامع الفنا

بقى لكوم غير القمر مالقيتوهاش فيه

رخفو شوية آلكوانب واللي عندو شي حل معقول وقابل للتطبيق وعملي وراديكال للقضايا ديال الظلم والحكرة يجيبو طودسويط وفيساع ولا يبلاع شناقو

واحد سميتو هشام من أمريكا قالك هو عارف كلشي حيث عندو اتصال بناس واعرين فالقصر الملكي

كيف جمهوري عندو اتصالات بالقصر؟ هادشي كايخاوف. اما الطبيب العسكري فحدث ولا حرج. راه عارف كلشي

 
مالكوم كلكوم: جمهوريين وشيوعيين ويساريين عاطيينها للتحراض ديال عباد الله عن بعد

إدا انتوما رجال، عريو على درعانكوم ودخلو للمعركة ولا سكتو علينا من التحراض وتعمار عقول الشباب بالتفاهات ديالكوم


قالك جمهوريين؟ ومن بعد؟ إسرائيل جمهورية وكوريا وإيران وجيبوتي وفنزويلا والبوليساريو جمهوريات، آش قضاو


وكاع عباد الله عارفا الواقع اللي عايشاه ومامحتاجاش ليكوم باش تنظرو من كندا واسبانيا وإيطاليا وأمريكا وبلجيكا وألمانيا وفرنسا وهلندة

باغين تواجهو النظام؟ ايوا دخلو للمغرب وبينو حنة يديكوم

انتوما خاصكوم تاكلوها باردة!

بمعنى ان المحكورين والمظلومين فالمغرب يدابزو مع المخزن ويطيحوه باش انتوما تدخلو من بعد راكبين على شار أو  دبابة مجهولة الهوية

عطيو التيساع للشعب المغربي ولا إدا كونتو باغيين تهزو السلاح فوجاه المخزن، التحقو بالبوليساريو ولا بخليفة حفتر ولا بالبغدادي